Kreu i Lëvizjes për Zhvillim Kombëtar, Dashamir Shehi ka komentuar deklaratat e kryeministrit Edi Rama, i cili i ka konsideruar dembelë shqiptarët dhe ka kërkuar që të vijnë forca punëtore nga Bangladeshi. Në një dalje në Facebook, siç bën Shehi zakonisht, kandidati për deputet tha se Rama në fakt shikon të moshuarit që ulen në kafene dhe u thotë se merren me thashetheme. Sipas Shehit, paga minimale në Shqipëri është shumë e ulët dhe kjo ka sjellë skenarin, që nëse je i ri merr valixhen dhe ikën.
“E kanë humbur shpresën tek tregu i punës. Vetëm vendet e deprimuara ekonomikisht, vendet që nuk kanë entuziazëm për të ardhmen. Gati 10% e shqiptarëve që mund të punonin sipas mendjes së kryeministrit nuk punojnë. Mirëpo pse nuk punojnë këta njerëz? Kush është ai që nuk do punë? Në radhë të parë u bë vite që formim profesional nuk ka, investime për të hapur vende të reja pune nuk ka, riformatim të profesioneve të ndryshme nuk ka fare.
Ne i jemi përshtatur kësaj situate, që nëse je i ri merr valixhen dhe ikën nëse je i vjetër dhe nuk ke mundësi të punosh dil te kafja e lagjes dhe e fshatit dhe aty thotë ky zotëria merren me thashetheme. Atë e shqetëson ideja pse marrin në gojë qeverinë dhe ky është halli më i madh i këtij. Paga mesatare në Shqipëri është 420 euro, paga minimale deri dje ishte 260 mijë lekë tani e kanë bërë 300 mijë lekë, në propozimet elektorale po duan ta bëjnë 300 euro. Kosova e vogël dhe e varfër e ka rrogën minimale 620 euro, Mali i Zi që ka më të lartën e ka 770 euro,” tha Shehi ndër të tjera.
