Mbledhja e Këshillit të Sigurimit ka filluar me debate për shkak se përfaqësuesi i delegacionit rus u shpreh i indinjuar për pjesëmarrjen e presidentit ukrainas në mbledhje, i cili do të mbajë edhe një fjalim. Ambasadori rus në OKB Vasily Nebenzya pati një debat me drejtuesin e mbledhjes kryeministrin e Shqipërisë Edi Rama. Nebenzya tha kryeministrit Rama se në mbledhje luan rolin e kreut të Këshillit të Sigurimit dhe jo atë të kryeministrit shqiptar, ndërsa i kërkoi kreut të qeverisë të përmbahet nga vlerësimet politike.
Rama iu kundërpërgjigj duke argumentuar se përfaqësuesi i Rusisë po fliste për tema që nuk kishin lidhje me takimin dhe po provokonte.
Pjesë nga diskutimi:
Nebenzya: Ju po veproni si kryetar i Këshillit të Sigurimit, nuk po flisni si përfaqësues i Shqipërisë. Objektivi juaj është të zhvilloni një takim siç sanksionohet në rregullore.
Rama: Sapo ju përgjigja pasi mu drejtuat si kryeministri shqiptar dhe pasi filluar të thonit gjëra të pasakta lidhur me atë çka është procedura këtu. Nëse nuk doni që t’ju përgjigjem në cilësinë e kryeministrit shqiptar, mos më provokoni.
Nebenzya: Zoti kryetar ju drejtohem vetëm si kryetar i Këshillit të Sigurimit, asnjëherë si kryeministër, ju lutem përmbahuni nga vlerësimet politike.
Rama: Folët për NATO-n, për faktin që Shqipëria është në NATO, për vendet që vijnë këtu, kjo nuk ka të bëjë fare me rolin tim në Këshillin e Sigurimit.
