Pasditen e sotme kryeministri Rama realizoi një komunikim live në Facebook me të gjithë qytetarët ku njoftoi vendime të rëndësishme dhe lehtësime të masave.
Kreu i qeverisë ka deklaruar se do falen të gjitha gjobat e vendosura deri tani për këmbësorët dhe automjetet që kanë thyer masat e marra kundër Covid-19.
Kjo do të thotë se 7 mijë e 107 qytetarë që kanë thyer masat si këmbësorë nuk do paguajnë gjobën 10 mijë lekëshe, teksa 1 mijë e 941 shoferëve që u është bllokuar mjeti apo automjeti, patenta dhe është dënuar me gjobë do i kthehet automjeti apo mjeti, patenta si dhe nuk do paguajë gjobë
Rama “lëshon dorën”: Fal 7 mijë gjoba për këmbësorët dhe u rikthen shoferëve patentat e bllokuara
Sakaq, kreu i qeverisë njoftoi edhe një sërë lehtësimesh të tjera, siç janë:
- Javën e ardhshme, bizneset do mund të punojnë lirisht, brenda fashës së përcaktuar 5 e mëngjesit – 5.30 pasdite apo me turne,
- Lëvizja me makina do jetë më e lehtë, pasi shoferët mund të marrin edhe një person tjetër në makinë,
- Të moshuarit mund të dalin nga shtëpia nesër vetëm për ajrosje deri në orën 11 dhe mund të shoqërohen nga një tjetër person,
- Nesër do të publikohen listat e bizneseve që fillojnë punën më 20 apo 27 prill,
- Nga e hëna për të shkuar në punë me makinë merrni autorizim javor te e-Albania,
- Nga java e ardhshme nuk ka më leje (autorizim) në policinë e shtetit, por te e-Albania
- Javën tjetër lejohet lëvizja me makinë për arsye shëndetësore, por vetëm me autorizim
Megjithatë, kreu i qeverisë tha se hapja mund të sjellë një shtim të numrit të të infektuarve dhe se të gjithë duhet të sillen sipas rregullave të përcaktuara deri më tani për të shmangur një valë të dytë të pandemisë.
“Hapja është një e panjohur, por duhet të jemi të vetdijshëm se mund të kemi rritje të paparashikuar të numrit të infektuarve. Virusin nuk e zhduk asnjë magji dhe askush prej nesh. Nëse ne mbrohemi fort dhe ruhemi kur dalim nga shtëpia, nuk infektohemi. Duhet të respektohen dhe rregullat bazë, jo duke menduar Kodin Penal, por prindërit dhe të afërmit tuaj. Jemi në një dinamikë dhe jemi në një proces, se nuk jemi vetëm ne dhe është dhe dikush që kërkon të na çojë në spital dhe të na marrë jetën. Unë u kërkoj ndjesë për çdo lloj peripecie, por përsëri të gjitha, do harrohen dhe ajo që do mbajmë mend është si do dalim nga kjo luftë, fitimtar apo të turpëruar,“-tha Rama.
Më tej ,kryeministri Rama ka bërë me dije se nga kjo betejë për një periudhë 4-mujore, nga maji në qershor parashikimi i qeverisë është për gjysmë miliardë humbje në buxhetin e shtetit!
https://www.facebook.com/edirama.al/videos/180159656338600/
