Ashtu siç kishte paralajmëruar edhe më parë, kryeministri Edi Rama ka ashpërsuar masat për parandalimin e koronavirusit.
Në një postim në rrjetet sociale, Rama bën me dije se nga ora 6 e mëngjesit e ditës së nesërme deri të dielën në mesnatë, nuk do të qarkullojë asnjë makinë.
Pas Durrësit dhe Tiranës, do të ndërpritet qarkullimi i autobusëve në Lezhë, Shkodër, Elbasan, Lushnje dhe Vlorë.
Qarkullimi do të jetë i hapur vetëm për ambulancat, automjetet që kryejnë shërbim shtetëror dhe ato të mallrave.
Aktualisht në vendin tonë janë shënuar 15 të infektuar dhe një viktimë.
Qeveria ka marrë një sërë masash shtrënguese për parandalimin e koronavirusit, duke pezulluar shkollat dhe duke ndaluar transportin e dhe tubimet.
Që prej ditës së djeshme, ushtria dhe policia kanë zbritur në rrugë dhe kanë ngritur 70 pika kontrolli në disa qytete.
Ministria e Shëndetësisë ndërkohë vijon me thirrjet për qytetarët, që të zbatojnë rregullat e higjienës dhe të minimizojnë sa më shumë daljet nga shtëpia.
Për qytetarët e kthyer nga Italia, Rama paralajmëroi gjoba deri në 5 mijë euro, nëse nuk zbatojnë rregullat e vetëkarantinimit.
