Një problem serioz me sistemin e “Raiffeisen Bank” ka shkaktuar panik mes mijëra klientëve në të gjithë vendin. Prej disa orësh, përdoruesit e bankës raportojnë pamundësi për të kryer veprime bazë si tërheqja dhe depozitimi i parave nëpërmjet bankomatëve të filialëve të ndryshëm.
Shumë qytetarë kanë deklaruar se kanë vendosur para në bankomatë, por ato nuk janë pasqyruar në llogaritë e tyre bankare. Edhe pse transaksioni është kryer fizikisht, balanca mbetet e pandryshuar, ndërsa banka nuk ka dhënë ende asnjë shpjegim zyrtar për situatën.
Nga ana tjetër, raste të shumta janë regjistruar edhe për tërheqje të pamundura të parave. Klientët raportojnë se bankomatët u shfaqin balancën reale në llogari, por veprimi për të tërhequr para nuk finalizohet. Përpjekjet për të kontaktuar shërbimin e klientit kanë rezultuar të pasuksesshme, pasi telefonatat nuk janë kthyer dhe komunikimi mbetet i bllokuar.
Në rrjetet sociale, konkretisht në faqen zyrtare të “Raiffeisen Bank” në Facebook, mungon çdo lloj njoftimi apo sqarimi për situatën, çka e ka shtuar më tej pasigurinë e klientëve.
Nuk është ende e qartë nëse bëhet fjalë për një defekt të përgjithshëm të sistemit apo thjesht për probleme me bankomatët në disa filiale të veçanta. Megjithatë, mungesa e transparencës dhe e një reagimi zyrtar nga banka ka përkeqësuar ndjeshëm besimin e përdoruesve.
