Një ngjarje tragjike ka ndodhur në Rinas, ku Han Draxhoshi, një punonjës sigurie i kompanisë “Illyrian Guard”, humbi jetën pas një aksidenti me rrymën elektrike gjatë kryerjes së detyrës së tij.
Sipas denoncimit të afërmve, Draxhoshi ka rënë në kontakt me energjinë elektrike në vendin e punës, tek Albcontrol, dhe pas aksidentit është dërguar në Spitalin “Nënë Tereza” për trajtim të djegieve. Ata theksojnë se vetëm kolegët e tij të punës e kanë dërguar në spital dhe jo ndihma e shpejtë, duke shtuar se nuk ka pasur një raport të policisë për ngjarjen.
Nga ana e saj, Policia e Tiranës ka konfirmuar se Draxhoshi ka pësuar aksidentin gjatë orarit të punës, duke rënë në kontakt me rrymën elektrike në një kabinë elektrike, disa metra larg vendit ku kryente shërbimin. Si pasojë e dëmtimeve të marra, ai ka ndërruar jetë në spital.
Grupi hetimor është angazhuar për të sqaruar rrethanat e ngjarjes.
