Prej dy vitesh banorët e Laçit janë pa spital… Godina u shemb si pasojë e dëmtimeve të mëdha që mori nga tërmeti i 26 nëntorit 2019. Ndërtimi për spitalin e ri që kap vlerën e 349 milionë lekë nisi në 2 shkurt të këtij viti, dhe u premtua se do të përfundonte për 4 muaj. Mbetja e punimeve ende në themele ka ngritur banorët e Kurbinit dhe aktivistët e shoqërisë civile në protestë.
Punimet për rindërtimin e Spitalit të Laçit prej 2 muajsh janë pezulluar. Përballë kësaj situate të krijuar, të rinjtë e Qendrës Rinore “Sebastia” kanë zhvilluar një protestë për zvarritjen e punimeve të spitalit, që është jetik për rreth 75 mijë banorët e zonës. Banorët thonë se edhe pse i janë drejtuar disa herë institucioneve për të marrë informacion, nuk kanë marrë përgjigje.
“Unë jam paraplegjik, i sëmur dhe duhet me shkuar në Lezhë ose në Tiranë për të bërë vizitat. Ka qenë një premtim për ta bërë shpejt por nuk u bë, në Fier u bë këtu jo”, tha një nga banorët.
“Kërkojmë nga drejtoria e spitalit Laç, drejtoria rajonale Laç, dhe Ministria e Shëndetësisë, të bëjë të njohur projektin, procedurat e tenderimit dhe të japë llogari për mungesën e tij deri më sot dhe për mungesën e informacionit të publikut”, u shpreh aktivistja e shoqërisë civile.
