Ditën e djeshme kryeministri njoftoi se më datë 1 qershor do të hapen plazhen për hotelet, kurse ka shtuar se më datë 10 qershor do të hapen plazhet për të gjithë shqiptarët.
Sakaq, fundjava do jetë e mbyllur edhe për 2 javët në vijim, sikundë ishte javë që lamë pas.
Ose le të themi se për disa ishte e mbyllur, por jo për shtresën elitare shqiptare.
Për shkak se njoftimi i kryeministrit Edi Rama për mbylljen e kësaj fundjave, u dha në orët e vona të mbrëmjes së të premtes, shumë biznese që ishin të painformuara u gjobitën, sepse kishin shkelur rregullat.
Por, në Dhërmi, nuk ndodhi e njëjta gjë.
Dosja.al ka publikuar disa pamje nga “Green Coast Resort”, që ka edhe barin “Nazar beach”, që është në pronësi të biznesmenit Samir Mane, i cili ka ofruar të gjitha shërbimet që mund të ofrojë një kompleks buzë detit.
Me shezlonge të hapura, bare e restorante në dispozicion, ky resort duket si në në një ditë normale pa pandemi, ndonëse qeveria ka lajmëruar se plazhet për hotelet do hapen më 1 qershor.
Në video dëgjohet muzika e lartë dhe shihen të rinj që kërcejnë e shijojnë perëndimin, teksa asnjë efektiv nuk duket gjëkundi për të shpërndarë pushuesit, siç bëri në plazhet publike.
Foto me tavolinat e mbushura plot me klientë janë shpërndarë edhe nga vetë faqja e barit, ku menaxherët e saj nxjerrin krejtësisht zbuluar biznesmenin Mane, që nuk respekton aspak rregullat e izolimit për bizneset e tij.
Nga ana tjetër, Dosja.al sjell edhe një foto nga bregdeti në Livadh të Himarës, i cili duke mos pasur ndërtime nga biznesmeni në fjalë apo komplekse si “Nazar beach”, nuk ka pasur fatin të mbushet me njerëz që të shijojnë detin e kësaj zone.
