Ndonëse prej ditësh Italia është bllokuar nga Coronavirusi, kjo nuk e ka ndaluar veprimtarinë kriminale në vendin fqinj.
Ditën e sotme karabinierët kanë arrestuar 3 shqiptarë pasi janë kapur me 10.5 kilogramë kokainë, vlera e të cilës shkonte në dy milionë euro.
Ata po udhëtonin me një kamion tip ‘Citroen C4’, kur janë ndaluar në sheshin e Italtrans në Kalkio dhe zbulimi i lëndës narkotike është bërë i mundur falë qenve anti-drogë.
Kokaina ishte fshehur mjaft mirë në një vend që komandohej nga disa butona, të cilët u zbuluan nga qentë.
Në pranga kanë rënë: një 34-vjeçar me iniciale K.M, një 36-vjeçar me iniciale B.B dhe për shtetasin me iniciale Z.M., 40-vjeç.
Ata janë shoqëruar në komisariat për veprën penale “Trafik i lëndëve narkotike”, ndërkohë që vijojnë hetimet për të zbuluar nëse shqiptarët kanë qenë të përfshirë në veprimtari të mëparshme kriminale.
Kujtojmë se në një raport të publikuar në fund të 2019 Ministria e Brendshme italiane informoi se grupet kriminale shqiptare janë ndër më aktivet në vendet e huaja dhe se Shqipëria cilësohet si vend tranzit i heroinës nga Azia Qëndrore dhe Afganistani drejt tregut të Europës Perëndimore.
Më tej, në raport thuhej se përveç trafikut të drogës aktiviteti kriminal shqiptar është përfshirë dhe në aktivitetin e prostitucionit e në krimin ndaj pasurisë si grabitje të dhunshme, kërcënim e zhvatje.
Mafia shqiptare ndër më të rrezikshmet në nivel ndërkombëtar! Shqipëria vend tranzit i heroinës
