Një ngjarje e rëndë është regjistruar këtë mesditë në Prishtinë, ku një 34-vjeçar ka plagosur me thikë partneren e tij dhe më pas ka vrarë veten. Ngjarja ka ndodhur rreth orës 15:00, kur Policia e Kosovës ka marrë informacion për dy persona të lënduar dhe ka ndërhyrë menjëherë në vendin e ngjarjes së bashku me ekipet emergjente.
Sipas zëdhënëses së Policisë së Kosovës, Flora Ahmeti, të dy personat dyshohet se janë goditur me mjet të mprehtë, konkretisht thikë. 30-vjeçarja është transportuar me urgjencë në spital për të marrë ndihmë mjekësore, ndërsa i riu 34-vjeçar ka ndërruar jetë në vendin e ngjarjes.
“Mbështetur në të dhënat fillestare, dyshohet se personat kanë pësuar lëndime nga një mjet i mprehtë, dyshohet thikë. Hetuesit policor po ndërmarrin të gjitha veprimet e duhura hetimore që do t’i kontribuonin hetimit të ngjarjes,” deklaroi Ahmeti.
Policia po punon për të zbardhur rrethanat e plota të këtij akti tragjik që ka tronditur opinionin publik.
