Dy të rinj nga Kamza mbetën të plagosur rëndë mesditën e sotme në Sarandë, pas një atentati me armë zjarri.
Ngjarja ndodhi rreth orës 15:00 në lagjen nr. 4, pranë stadiumit të qytetit. Të plagosur kanë mbetur Gëzim Hoxhaj, 32 vjeç, dhe Ernest Lama, 24 vjeç, të cilët pas ndihmës së parë janë transportuar me urgjencë drejt Spitalit të Traumës në Tiranë për trajtim të specializuar, për shkak të gjendjes së rënduar shëndetësore.
Policia ka identifikuar si autorë të dyshuar të sulmit dy vëllezërit Ramadan dhe Erion Canaj (i njohur dhe si Zoto), të cilët janë shpallur në kërkim.
Identifikimi i tyre u bë përmes kamerave të sigurisë në zonë. Njëri prej tyre dyshohet se ka qëlluar drejtpërdrejt në drejtim të viktimave, përpara se të largoheshin nga vendngjarja.
Gjatë kontrollit të vendit të ngjarjes, policia ka sekuestruar një çantë me një armë zjarri brenda, si dhe ka gjetur katër gëzhoja. Ende nuk është sqaruar nëse arma u përket autorëve apo të plagosurve.
Vëllezërit Canaj konsiderohen persona me rrezikshmëri të lartë. Ramadan Canaj ka qenë më parë i dënuar në Greqi për vrasje dhe armëmbajtje pa leje, ndërsa aktualisht është në proces gjyqësor në Sarandë për goditje për shkak të detyrës.
Gjatë qëndrimit në Greqi, ai ka qenë i përfshirë edhe në një shkëmbim zjarri me policinë greke. Ndërkohë, Erion Canaj ka qenë i arrestuar në shkurt 2024 për armëmbajtje pa leje, por është shpallur i pafajshëm nga gjykata, dhe më herët, në dhjetor 2022, kishte dhunuar rojen e spitalit të Sarandës.
Dyshimet e para flasin për një konflikt të mëparshëm mes palëve si shkak i sulmit, por grupi hetimor, nën drejtimin e Prokurorisë së Sarandës, po vijon hetimet për të zbardhur plotësisht rrethanat dhe motivet e kësaj ngjarjeje të rëndë.
Në zonë janë shtuar kontrollet dhe forca të shumta policie janë angazhuar për kapjen e autorëve.
