Mesfushori i Kombëtares Shqiptare, Qazim Laçi, ka ndarë emocionet e tij pas pjesëmarrjes në Kampionatin Europian 2024 përmes një postimi në rrjetet sociale. Laçi theksoi rëndësinë e këtij turneu për të dhe ekipin, duke shprehur krenari për performancën e Shqipërisë.
“Jam shumë krenar dhe i lumtur që isha pjesë e Kombëtares shqiptare në këtë Euro 2024! Shqipëria jonë ka treguar karakter, si brenda ashtu edhe jashtë fushës! Kemi treguar mentalitetin e duhur, zemër, kemi dhënë shpirtin në fushë dhe kemi sakrifikuar duke mos u dorëzuar asnjëherë dhe jam i bindur se kemi treguar vlerat tona më të mira si popull shqiptar!” – ka shkruar Laçi në postimin e tij.
Ai vazhdoi duke falënderuar të gjithë pjesëtarët e skuadrës, stafin teknik dhe drejtuesit e FSHF-së për punën e palodhur që kanë bërë gjatë turneut.
“Dua të falënderoj të gjithë çunat, stafin teknik dhe të gjithë drejtuesit e administratën e FSHF-së për punën e bërë,” shtoi ai.
Në fund, Laçi shprehu mirënjohjen e tij të thellë për tifozët shqiptarë që kanë mbështetur ekipin në të gjitha ndeshjet. “Faleminderit shumë tifozëve, të cilët ishin të mrekullueshëm dhe na kanë mbështetur në të gjitha ndeshjet dhe jam i sigurt që do vazhdojnë ta bëjnë këtë për ta parë Shqipërinë tonë sa më lart edhe në të ardhmen! STRONGER TOGETHER,” përfundoi ai.
Kombëtarja Shqiptare ka treguar një performancë të denjë në Euro 2024, duke reflektuar përpjekjet dhe sakrificat e të gjithë lojtarëve dhe stafit të saj.
