Pylli i lagjes “Plepat e Brukës” në Laknas, është i rrezikuar nga ndërhyrjet e firmës private “BioProducts” shpk. Biznesi në fjalë është duke u përpjekur që prej vitit 2018 që të ndërtojë një thertore në këtë zonë, të prezantuar ai “agroturizëm”.
Banorët nuk kanë qenë dakord me projektin, pasi e shohin si përvetësim i një hapësire publike me pyje, të cilën ata e kanë mbjellë dhe e kanë ruajtur dhe që mbron mjedisn e zonës nga ndotjet dhe erozioni. Ata janë mbledhur me njëri-tjetrin dhe kanë dërguar disa kërkesa pranë bashkisë Kamëz, Komisariatit të Policisë nr. 5 në qytet, Kryetarit të Bashkisë Rakip Sulit dhe 41 këshilltarëve të Këshillit Bashkiak. Banorët kërkojnë që institucionet të jenë të pranishëm fizikisht dhe të njoftojnë nëse kanë dhënë eje apo nëse janë në dijeni për ndërhyrjen e kompanisë.
Nyje.al shkruan se sipas banorëve, javën e ardhshme firma private do të fillojë punimet në zonë, pa pritur të përfundojë procesi gjyqësor në shkallë të parë të Gjykatës Administrative, duke dalë ëkshtu kundër çdo parashikimi ligjor. Procesi gjyqësor ka nisur prej vitit 2019 dhe seanca e radhës pritet të jetë në shtator. Vendimi i ndërmjetëm në shkallën e parë ka siguruar pezullimin e punimeve, mirëpo në dhjetor të vitit 2020 Gjykata Administrative e Apelit ka rrëzuar masën e sigurisë duke i hapur rrugën firmës për të nisur ndërtimin.
Nga institucionet përkatëse siç është Policia e Kamzës apo Bashkia e Kamzës, nuk ka pasur asnjë konfirmim nëse firma private do të fillojë punimet apo jo.
Bashkia e Kamzës ka një kontratë 20-vjeçare me firmën “BioProducts”, që është lidhur që në vitin 2018, kur në krye të institucionit ka qenë Xhelal Mziu. Pasi në krye të Bashkisë erdhi Rakip Suli, banorët janë përpjekur disa herë ta takojnë e t’i kërkojnë prishjen e kontratës, por asnjë veprim institucional nuk është ndërmarrë.
Aktivistët e Grupit ATA në korrik të këtij viti propozuan në mbledhjen e Këshillit Bashkiak që të merret nisma për të ndryshuar zërin kadastral të Plepave të Brukës, dhe për ta bërë atë nga “zallishte”/”ranishte” në “pyll”.
Kryebashkiaku Suli dhe kryetari i Këshillit, Ali Dauti nuk kanë rënë dakord me këtë propozim, me argumentin se nuk mund të dalin mbi gjykatën, edhe pse Këshilli Bashkiak ka kompetencë ta shpallë një zonë të tillë, nëse i plotëson të gjitha kushtet fizike për t’u shpallur zonë e mbrojtur pyjore.
Për projektin e thertores janë miratuar Vlerësimi i Ndikimit në Mjedis, Leja e Zhvillimit dhe Leja përkatëse e ndërtimit, akte të cilave aktualisht ju ka përfunduar afati ligjor përkatës, megjithëse banorët kanë dyshime se leja mund të jetë rinovuar nga Bashkia e Kamzës.
Banorët e Laknasit kanë marrë edhe shkresën nga Inspektoriati Kombëtar i Mbrojtjes së Territorit (IKMT), që në shkurt të vitit 2021, e cila saktëson se muk duhet të ketë ndërhyrje dhe prerje drurës, pasi 200 banorët e zonës rrezikohen nga prurjet e lumit të Tiranës dhe erozioni. Banorët shpresojnë se IKMT-ja do të ndërhyjë për të mos lejuar ndërtime, ndërsa kanë bërë thirrje për mbështetje nga komuniteti i Kamzës dhe më tej.
