Sekretari i Përgjithshëm dhe Drejtori Juridik i Bashkisë së Tiranës, Alban Dokushi, është paraqitur në Prokurorinë e Posaçme Kundër Korrupsionit dhe Krimit të Organizuar (SPAK) mesditën e sotme, më 18 mars. Sipas raportimeve të gazetares Klodiana Lala, ai është thirrur për t’u marrë në pyetje nga prokurorët e posaçëm në lidhje me çështjen e kryebashkiakut të arrestuar, Veliaj.
Dokushi konsiderohet një nga bashkëpunëtorët më të afërt të Veliajt dhe e ka shoqëruar atë gjatë paraqitjes në SPAK, pak para se të ndalohej nga autoritetet. Pas arrestimit të kryebashkiakut më 10 shkurt, ai ishte gjithashtu personi i parë që e vizitoi Veliajn në qelitë e paraburgimit tek Blloku i Sigurisë në burgun 313.
Gjatë vizitës së tij në paraburgim, Alban Dokushi mbante në duar disa dokumente si dhe librin “The Black Swan” të autorit Nassim Nicholas Taleb, të cilin mesa duket ia kishte sjellë Veliajt për ta lexuar në burg.
Libri, i botuar në vitin 2007, fokusohet në ndikimin ekstrem të ngjarjeve të rralla dhe të paparashikueshme dhe në tendencën njerëzore për të gjetur shpjegime të thjeshta për këto ngjarje, pasi ato kanë ndodhur. Ky koncept mund të shihet si një paralele me situatën aktuale të Veliajt dhe zhvillimet e papritura politike që e kanë përfshirë atë.
Ende nuk ka detaje mbi dëshminë që Dokushi ka dhënë sot në SPAK, ndërsa hetimet mbi çështjen “Veliaj” vijojnë.
