Presidenti rus Vladimir Putin është gati për negociata me udhëheqjen e Ukrainës, tha për Interfax-in rus Dmitry Peskov, zëdhënësi i Putinit. Pritshmëria e Putinit, sipas tij, është njohja e statusit neutral nga Ukraina dhe refuzimi i vendosjes së armëve. Peskov beson se Ukraina dhe Rusia duhet të zgjidhin problemet e tyre të vijës së kuqe.
Duke sqaruar çfarë nënkupton çmilitarizimi, Peskov ka thënë se ky proces është “neutralizim i potencialit ushtarak, që së fundi është rritur edhe për shkak të përpjekjeve aktive të shteteve të huaja”.
Duke iu përgjigjur pyetjes se sa thellë planifikon të hyjë Rusia në Ukrainë, Peskov ka thënë se nuk mund të japë informacione lidhur me ushtrinë, teknologjinë dhe elemente tjera të operacionit.
“Burimi i vetëm për ato të dhëna është institucioni ynë i mbrojtjes, ushtria jonë”.
“Kushtet e operacionit do të definohen nga efikasiteti, dhe natyrisht do të përcaktohen nga komandanti suprem”.
Sulmi i Moskës ndaj Ukrainës ka nisur në orët e para të 24 shkurtit.
Raketat janë nisur në aeroporte dhe infrastrukturë ushtarake në rreth 25 qytete.
Presidenti rus, Vladimir Putin ka urdhëruar “operacion special” për të çmilitarizuar Ukrainën.
Veprimi i Kremlinit ka nxitur zemërim dhe është dënuar në gjithë botën.
Shtetet e Bashkuara dhe aleatët e kanë paralajmëruar sanksione të ashpra kundër Moskës.
