Një aksident tragjik automobilistik ka ndodhur sot në Iballë të Pukës, ku si pasojë e tij ka humbur jetën Drejtor i Inspektoratit të Mbrojtjes së Pyjeve në Shkodër, Mark Ndou.
Mjeti me të cilin po udhëtonte ai doli nga rruga duke bërë që Ndou të humbë jetën. Dy shtetas të tjerë, punonjës të pyjores, janë dërguar urgjent me helikopter drejt Tiranës.
Mark Ndou mësohet se ishte nisur për punë drejt Iballës, për inspektim në pyje, por ka humbur jetën në këtë aksident tragjik.
Ngjarja ndodhi në fshatin Bugjon të Pukës rreth orës 14:00, ku mësohet se punonjësit kanë humbur kontrollin duke dalë nga rruga. Mësohet se punonjësi Mark Ndou është nxjerrë nga mjeti dhe është transportuar në Spitalin e Pukës fillimisht, por për fat të keq ai nuk ka mundur të mbijetojë për shkak të pkagëve të rënda që ka marrë.
Makina u përmbys duke vënë poshtë dy punonjësit, njëri prej të cilëve është nxjerrë dy orë pas aksidentit. Për shkak të terrenit të vështirë, autoambulanca nuk mundi të ndërhynte për të nxjerrë të plagosurit, prandaj u kërkua ndërhyrja e helikopterit.
Prej 7 vitesh, Ndou ishte në krye të Inspektoratit të Pyjeve, ndërsa më përpara ka qenë edhe anëtar i këshillit bashkiak të Shkodrës, nën siglën e Partisë Socialiste të Moderuar “PSM”.
/GazetaReforma.com/
