Ditën e sotme janë publikuar rezultatet e provimit të maturës shtetërore për lëndën e matematikës. Ministrja e Arsimit, Evis Kushi me anë të një njoftimi zyrtar ka thënë se e ka marrë parasysh kërkesën maturantëve për uljen e pragut të pikëve.
Kushi thotë se Komiteti i Maturës Shtetërore vendosi uljen e kufirit minimal të kalueshmërisë dhe atë të pikëve për çdo notë. Më tej ministrja e Arsimit ka bërë me dije se 1820 nxënës kanë marrë notën 10
Njoftimi i ministres së Arsimit Evis Kushi:
Të dashur maturantë, sipas angazhimit tonë, ne analizuam me shumë kujdes çdo shqetësim tuajin dhe të mësuesve mbi testin e matematikës në Maturën Shtetërore dhe pas vlerësimit të të gjitha testeve, duke marrë në konsideratë vështirësitë e këtij viti shkollor, me vendim unanim të Komitetit të Maturës Shtetërore, kemi vendosur uljen e kufirit minimal të kalueshmërisë dhe atë të pikëve për çdo notë.
Shumë suksese në sezonin e vjeshtës atyre që nuk ia dolën dot të jenë kalues dhe urimet më të përzemërta të gjithë të tjerëve, sidomos 1,820 nxënësve nga e gjithë Shqipëria që kanë marrë notën 10.
Kujtojmë se pas zhvillimit të provimit të matematikës në 12 qershor, nxënës nga disa qytete të vendit dolën në protestë me pretendimin se teza ishte shumë e vështirë. Protesta u zhvilluan për disa ditë me rradhë, ku maturantët kërkonin uljen e pikëzimit dhe pragun e kalueshmërisë.
