Fushata elektorale në Shqipëri nisi me datën 25 mars, 30 ditë para zgjedhjeve të 25 prillit. E ashtu siç pritej, liderët politikë vazhduan me mitingjet e marshimet e tyre në çdo qytet të Shqipërisë. Nuk u penguan aspak nga pandemia, pasi grumbullimet dhe mos-vendosja e maskave, ka qenë prezente gjatë gjithë kohës.
Por fushata elektorale, nuk është bërë vetëm në qytetet e Shqipërisë, por dhe në rrjetet sociale. Ka qenë Edi Rama ai që ka investuar më shumë për postimet e tij në rrjetet sociale. Jo vetëm për videot apo fotot e sponsorizuara, jo vetëm për stafin që ka të punësuar për menaxhimin e imazhin e faqeve të tij, por dhe për të bindur personazhe të famshëm shqiptarë për t’i bërë fushatë.
Robert Ndrenika, aktori i mirënjohur shqiptar, ishte figura e parë që Rama politizoi dhe e bëri pjesë të fushatës së tij elektorale. Edhe pse mori shumë kritika për këtë gjë, kryeministri nuk u ndal, por mori në një spot tjetër të tij, edhe aktoren Tinka Kurti.
LEXO EDHE: Rama nuk kursehet! Pas Robert Ndrenikës, politizon një tjetër aktore të mirënjohur (VIDEO)
Por çfarë përfitimesh kanë pasur këta aktorë të mirënjohur që po mbështesin Ramën në fushatën e tij elektorale? Sa i takon Tinka Kurtit, është Erjon Veliaj, kryebashkiaku i Tiranës, ai që na ka dhënë një “përgjigje”.
Me datë 17 dhjetor të vitit të shkuar, Veliaj festonte ditëlindjen e tij të 41-të, por në të njëjtën datë, edhe aktorja Tinka Kurti festoi 88-vjetorin e saj. Veliaj shkoi për ta uruar aktoren për ditën e shënuar, por edhe për shtëpinë e re.
Tinka Kurtit iu ri-ndërtua shtëpia e re pas tërmetit të 26 nëntorit dhe Veliaj, nuk ngurroi të tregonte “punën” e bërë nga Bashkia e Tiranës. Pra, Tinka Kurti e ka pasur dhe si “detyrim” të mbështesë Edi Ramën në fushatë zgjedhore, pasi kryeminstri nuk e ka të vështirë t’i thotë: “Unë të kam bërë shtëpinë”.
Në rregull, mbështetjen e Tinka Kurtit dhe të familjarëve të saj, e more zoti Kryeministër, por a nuk interesohesh dhe për mbështetjen e qindra familjeve që janë ende në çadra? Mbështetjen e familjeve që iu ke prishur pronat me të padrejtë, me pretekstin që janë dëmtuar nga tërmeti? Ah po, mbështetja e tyre nuk të duhet, pasi nuk janë aq të njohur sa Tinka Kurti…
GAZETA REFORMA
