Intubimi i pacientëve të infektuar nga COVID-19, konsiderohet si një nga fazat më kritike, pasi shpesh herë personat që përballen me këtë fazë nuk ia dalin të mbijetojnë.
Fatkeqësisht në vendin tonë, asnjë prej të intubuarve nuk ka mundur ta mposhtë sëmundjen.
Së fundmi, lidhur me këtë ka folur edhe ministrja e Shëndetësisë Ogerta Manastirliu, e cila realizoi një lidhje me Skype për emisionin “Real Story”.
Ministrja tregoi se nuk ka të dhëna që të tregojnë sa pacientët që janë në intubim nuk mbijetojnë dhe rrjedhimisht ajo nuk mund të dalë në përfundmie.
Sakaq, Manastirliu shtoi se janë duke bërë një studim të tillë mbi rastin e fataliteteve, teksa ka treguar se pjesa më e madhe e atyre që kanë qenë në intubim dhe kanë ndërruar jetë kanë patur tipologji të rënda, moshë të madhe, lidhet me sëmundjet shoqëruese.
“Mund të them diçka, që ka përpjekje për të mbërritur në përfundime, por unë nuk do doja të ndalesha në analiza të hollësishme, ne kemi bërë analizë për çdo rast. Për ne nuk janë statistikat, janë jetët njerëzore. Nuk dyshoj në cilësitë e mjekëve dhe infermierëve. Por, diskutoj shpesh dhe më thonë që edhe në botë nuk ka të dhëna dhe studime që të thonë sa persona që janë në intubim mbijetojnë dhe sa jo. Ne jemi duke bërë një studim të tillë mbi rastin e fataliteteve. Duhet të kuptojmë që pjesa më e madhe e atyre që kanë qenë në intubim dhe kanë ndërruar jetë kanë patur tipologji të rënda, moshë të madhe, lidhet shumë me sëmundjet shoqëruese. Megjithatë unë them se jemi herët për të bërë konkluzione dhe analiza.”
Deri tani në vendin tonë kanë ndërruar jetë 22 persona në vendin tonë, teksa momentalisht 8 janë intubuar, kurse 12 persona janë në terapi intensive, në dy spitalet COVID.
