Ish-kapiteni i kombëtares italiane të futbollit, Francesco Totti ka dalë në krah të këgëtares shqiptare, Dua Lipa, e cila është përfshirë së fundmi në një debat të ashpër për Kosovën. Totti ka pëlqyer postimin e bërë në Instagram nga Dua, ku shfaqet harta e “Shqipërisë së Madhe” me mbishkrimin ‘autochthonous’.
Ky veprim i ish-lojtarit të Romës ka zemëruar serbët, të cilët e konsideronin mik të tyrin.
“Pse na zhgënjeve, vëlla?”, janë titujt e disa prej portaleve në Serbi, të cilat publikojnë foton që tregojnë se Totti ka miratuar postimin e Duas.
Debati në rrjetet sociale nisi pasi Dua Lipa kërkoi nga kompania amerikane Apple që të vendoste Kosovën në hartë dhe jo ta njihte si pjesë të Serbisë. Kundër kësaj kërkese reaguan disa prej këngëtareve serbe, të cilat nuk i kursyen deklaratat nacionaliste.
Fushata e Dua Lipës ndaj Apple ka marrë mbështetjen edhe të këngëtareve të tjera shqiptare me famë botërore si Rita Ora, Ava Max apo Era Istrefi.
