Deputeti demokrat Myslim Murrizi ka akuzuar ministren e Financave, Anila Denaj, se i ka falur gjobën kompanisë “Bankers Petroleum”.
Ai i kërkoi llogari Denajt, se përse ky subjekt nuk është kontrolluar asnjëherë, shkruan “Dosja.al”.
Gjithashtu Murrizi kritikoi aksionin-antiinformalitet, duke thënë se me aplikacionin e denoncimeve për mosdhënie kuponi, është krijuar një ushtri spiunësh.
“Ju jeni të pangopur nga diktatura dhe po kërkoni që të beni një ushtri me vullnetarë që të spiunojë. Unë nuk e shkarkoj atë aplikacionin për spiunët dixhital, pasi i kam përzënë në që në 1991 të gjithë spiunët dhe do i përzë dhe nga ky Kuvend nëse ka ende. Unë të them pse e ke falur atë gjobën e Bankers ti thua jo është pezulluar. Pse e ke pezulluar? Më thuaj kush e kontrollon këtë subjekt, pse nuk keni shkuar asnjëherë për kontroll tek Bankers? Më thuaj sa vjet ka kjo kompani që ka dorëzuar bilanc financiar?”, tha Murrizi.
Denaj është përgjigjur duke thënë se gjoba është pezulluar, por nuk është falur. Ajo sqaroi më tej, se kjo gjë ka ndodhur, pasi priten referenca nga avokatura e shtetit.
“Është një proces që ne e kemi deklaruar pse e kemi pezulluar gjobën. Procesi i pezullimit është bërë për të marrë referenca nga avokatura e shtetit dhe instanca të tjera. Po e theksoj nuk është falje por është një pezullim”, u shpreh Denaj.
