Ditën e sotme Partia Socialiste ka tërhequr nga rendi i ditës projektligjin për Amnistinë Penale, duke arsyetuar se ky veprim erdhi në shenjë respekti të traditës që amnistia votohet me konsensus.
Lidhur me këtë, kanë folur dy deputetët e opozitës, Gazment Bardhi dhe Ervin Salianji, të cilët shprehen se arsyeja e vërtetë e tërheqjes së këtij projektligji është se PS-ja nuk po mundet të sigurojë votat që i nevojiten.
Salianji u shpreh se arsyeja e vërtetë është që janë prishur pazaret mes Ramës dhe Bashës.
“Tërheqja e “Amnistisë Penale” nga seanca e sotme., është një dakordësi apo pazar i prishur me Bashën çoi në tërheqjen e Amnistisë Penale. PR ligji që ka mbërritur në Kuvend, shmang atë që duhet të kenë amnistinë. Nuk i arritën 84 vota ndryshe do të kalonte sot”, tha ai.
Ndërsa deputeti Bardhi në përfundim të seancës plenare komentoi se heqja e amnistisë penale nga rendi i ditës erdhi për shkak se nuk u arrit konsensusi me opozitën.
Bardhi tha se PS u tërhoq pasi nuk arriti dot pazarin, ndërsa hodhi sërish akuza se duan të amnistojnë ministra e kryetarë bashkish të korruptuar.
“Për shkak se nuk arritën dot pazar e tërhoqën amnistinë, nga një pr.ligj humanitar nga ku do duhet të përfitonin qytetarët e zakonshëm që ndodhen në burg, e shndërruan në ligj për të amnistuar ministra, kryetarë bashkish e drejtorë të korruptuar. Mbetet e papranueshme, tentuan të mashtronin opinion publik duke ia faturuar opozitës. U tërhoqën nga pr.ligji që e kishin miratuar në komisione me procedurë jo transparente”, tha Bardhi.
