Me kërkesë të kryeministrit Edi Rama mëngjesin e ditës së sotme është mbledhur grupi parlamentar i Partisë Socialiste. Sipas informacioneve të marra mësohet se në mbledhje është rënë dakord unanimisht që gjatë mbledhjes së Kuvendit të Shqipërisë, që do të zhvillohet ditën e enjte, do të votohet kundër ngritjes së komisionit hetimor për ‘Becchetin’ të propozuar nga Partia Demokratike. Shumica socialiste do të rrëzojë një nga tre komisionet hetimore që ka kërkuar Partia Demokratike, ndërsa për dy të tjerët ka dhënë “OK”, por edhe pranimi i tyre është bërë me disa kushte të vendosura nga Partia Socialiste.
Ndërkohë, është vendosur që të votohet pro ngritjes së komisioneve të tjera hetimore, për ‘Inceneratorët’ dhe për ‘zgjedhjet e 25 prillit’. Për komisionin e fundit, PS do të kërkojë riformulim i objektit të hetimit.
Vendimi i shumicës socialiste pritet që të shkaktojë reagim të fortë te Partia Demokratike, duke sjellë debate dhe tensione e sidomos në mbledhjen që do të mbahet të enjten e cila do të këmbëngulë te hetimi i çështjes “Becchetti”, por edhe te qëndrimi që ka duke mos ndryshuar objektin hetimor për dy komisionet e tjera që ka kërkuar. Seanca e së enjtes pritet që të sjellë debate të forta në Kuvend.
