Kryesuesi i listës së Lëvizjes Socialiste për Integrim në Berat, Ardit Çelaj, ka zhvilluar ditën e sotme një tryezë “Kuçova – Zonë e Lirë Ekonomike”. Ajo që vihet re në këtë tryezë është pjesmarrja e ish-ministrit të Financave, Arben Malaj.
Malaj gjatë fjalës së mbajtur është shprehur se tani mban postin e ekspertit në Partinë Agrare Ambientaliste, ndërsa ka renditur, sipas tij, një sërë problemesh që ka ekonima shqiptare. Ish-ministri socialist në këtë tryezë ka zgjedhur ti përgjigjet edhe kryeministrit Edi Rama, lidhur me deklaratën e një biznesmeni i cili u shpreh se planifikon të marrë 200 punonjës nga Bangladeshi. Ish- ministri I Financave ka kujtuar edhe vitin 2013 kohë kur Partia Socialiste i “mbylli derën”.
“Vendi ka nevojë për deputetë me integritet, të mirëarsimuar dhe të përkushtuar. Në lista për fat të keq ka dhe modele jo pozitive, që kërkojnë mandat si deputet, por që kanë qenë më herët si kryetarë bashkie dhe jetojnë vetëm si manekinë të kryetarëve. Më 2013, kur një derë u mbyll, që ishte ajo për t’i shërbyer PS me dinjitet, jo vasalitet, kam krijuar mundësi për mbështetjen e studentëve. Dija është një e mirë që duhet shpërndarë te të gjithë. Dija pa integritet dhe përkushtim nuk prodhon atë për të cilën ka nevojë Shqipëria e shqiptarët. Unë do ta vazhdoj këtë lloj kujdestarie bashkëpunimi me Arditin, sepse ne i kemi të gjitha kapacitetet.
Sfidat janë: ekonomia e gjelbër, ekonomia e dijes dhe këtu është avantazhi i Arditit. Të dyja këto janë të kryqëzuara me digjitalizimin. Barazia e mundësive duhet të jetë, ndërsa barazia e të ardhurave është sfidë e gjithsecilit. Ne kemi gjetur njeriun e duhur për sfidat e duhura. Shqetësuese është braktisja, të cilën ne nuk mund ta ndalim. E vetmja mundësi e jona për të ndalur braktisjen është të kemi më shumë njerëz të mirëarsimuar. Guri i rëndë në vend të vet, është një shprehje për çdo komb. Nuk është e lehtë të bësh një karrierë në një vend, që nuk është i joti. Një përgjigje edhe për kryeministrin, për Bangladeshin, mundësia e parë ju ofrohet vendasve, pastaj të huajve. Ka ardhur një moment që ne duhet të ndërgjegjësohemi që Shqipëria, e çdo zonë, duhet qeverisur me zemër dhe jo me arrogancë. Pabarazia sot është një nga sfidat më të mëdhaja që ushqen radikalizmin partiak”, tha Malaj.
