Kreu i Grupit Parlamentar të Partisë Socialiste, Taulant Balla ka mbledhur paraditen e sotme Kryesinë e PS-së, për herë të parë pasi deputetët bënë betimin në Presidencë.
Mësohet se mbledhja është mbajtur në selinë e Partisë Socialiste, si u përmend edhe ëm lartë kjo është mbledhja e parë që zhvillohet me kabinetin e ri qeveritar. Taulant Balla, në këtë mbledhje, iu ka kërkuar të gjithë socialistëve që të nisin menjëherë punën për ndryshimet kushtetuese për zgjatjen e procesit të Vettingut.
“Të filloje puna për ndryshimet kushtetuese për zgjatjen e procesit të Vettingut”, mësohet të ketë thënë Balla.
Kujtojmë se përpara disa ditësh Presidenti i Republikës, Ilir Meta i dërgoi një shkresë Prokurorisë së Përgjithshme, ku i kërkonte informacion në lidhje me 16 emrat e rinj që kishte dërguar kryeministri i vendit, Edi Rama për formimin e qeverisë “Rama 3”. Pasi mori një përgjigje nga Prokuroria e Përgjithshme dhe SPAK-u, Presidenti Meta dekretoi pa asnjë hezitim emrat e rinj të kabinetit qeveritar.
Më pas kabineti i ri qeveritar u aprovua edhe nga Kuvendi i Shqipërisë, në një seancë të gjatë maratonë. Kryeministri Edi Rama së bashku me ministrat e kabinetit të ri qeveritar, u betuan në Presidencë për të vazhduar më pas edhe me mbledhjen e kabinetit ku u propozua edhe hapja e një Agjencie për Mediat.
