Pas skandalit të Partisë Socialiste që shpërfilli vendimin e Gjykatës Kushtetuese duke mos e çuar në këtë gjykatë mandatin e Olta Xhaçkës, kryetari i grupit parlamentar të Partisë Socialiste reagon në lidhje me qëndrimin e SHBA-së. Sipas Niko Peleshit bëhet fjalë për një paqartësi, ndërkohë votat pro u ngritën për të mbrojtur Olta Xhaçkën. Edhe votën ‘abstenim, pro dhe kundër’ të kuvendit në seancën e vonë të 13 shtatorit e quan pjesë e kësaj paqartësie për të cilën kërkohet mendimi i Komisionit të Venecias.
“Nuk bëhet fjalë për kundërshtim të Gjykatës Kushtetuese. Ne e zbatuam sa i takon futjes në seancën e parë plenare, data 12 shtator…Është e vërtetë që ky mocion nuk përparon dot për shkak të votimit abstenim, pro e kundër që është shprehje e paqartësisë. Të gjithë palët janë në të drejtën e tyre por cila palë prevalon, e drejta e deputetit për të votuar si do, apo detyrimi për të votuar sipas vendimit të gjykatës Kushtetuese” tha Peleshi.
Deputetët e parlamentit nuk kryejnë detyrat minimale
Por, nuk kuptohet përse Niko Peleshi u shpreh se ishte një paqartësi për këtë çështje, ndërkohë që kartonat u ngritën pro mbrojtjes së Olta Xhaçka. Mos vallë deputetët e parlamentit shqiptar kanë votuar me urdhër, e pa kuptuar rëndësinë e kësaj çështje. Çfarë nënkuptoi, kryetari i grupit parlamentar të Partisë Socialiste Niko Peleshi kur tha që ishte paqartësi?! A është kjo një përgjigje që deputetët nuk i kryejnë detyrat e shtëpisë për të cilët paguhen nga taksat e popullit? A e konfirmoi Niko Peleshi faktin që kanë votuar pa kuptuar për çfarë po votojnë, por thjesht me direktiva nga lart?!
