SPAK ka zbuluar një episod të ri korrupsioni që dyshohet të përfshijë Ilir Metën dhe Monika Kryemadhin, sipas raportit të fundit dymujor.
Në këtë dokument bëhet me dije se Kryemadhi ka shpenzuar rreth 240 mijë dollarë me kartën e biznesmenit shqiptaro-amerikan Adrian Shatku.
Sipas hetimeve të SPAK, kjo shumë është përdorur për blerje luksi në dyqane veshjesh në qytete si Londra, Vjena, Las Vegas dhe Beverly Hills, si dhe për shpenzime që lidhen me qëndrime në hotele dhe bileta avioni gjatë udhëtimeve në vende si Londra, New York dhe Las Vegas.
Në raport thuhet se gjatë periudhës Dhjetor 2014- Nëntor 2017, Monika Kryemadhi ka kryer pagesa me kartën American Express Centurion me një vlerë totale prej 234,677.83 dollarë, kryesisht për shpenzime luksi dhe udhëtimi.
Ilir Meta, president i Partisë së Lirisë, u arrestua më 21 tetor 2024. Ai dhe Kryemadhi akuzohen se, duke bashkëpunuar me njëri-tjetrin dhe me funksionarë të tjerë shtetërorë, prej 15 vitesh kanë përdorur pozicionet e tyre për të favorizuar kompani private dhe përfituar nga veprimtari të ndryshme, përfshirë lobime në SHBA dhe shitblerje banesash, duke fshehur paratë e përfituara dhe pa i deklaruar ato në ILDKPI dhe KQZ.
Monika Kryemadhi po hetohet për tre akuza: pastrim parash, korrupsion dhe mosdeklarim të ardhurash.
Më 23 tetor, gjykata la në fuqi masën “detyrim për t’u paraqitur në policinë gjyqësore” për Kryemadhin dhe Ema Çokun, që po hetohet për pastrim parash.
Ndërkohë, masa e sigurisë ndaj Piro Xhixhos, i akuzuar për korrupsion pasiv, u ndryshua nga “arrest shtëpie” në “detyrim për t’u paraqitur në policinë gjyqësore”. Të tre të hetuarit duhet të paraqiten një herë në muaj në zyrat e SPAK.
