Partia Demokratike duket se dëshiron që sjelljen e banorëve të Astirit ta përcjellë tek gjithë qytetarët e tjerë të vendit dhe kjo është dalluar edhe një herë.
Pas bllokimit të autostradës Kavajë-Lushnjë disa ditë më parë nga simpatizant të kësaj partie në Rrogozhinë, duket se e njëjta gjë ka ndodhur edhe ditën e sotme me disa protestues në qytetin e Fierit.
Protestuesit e lajmëruar se do të kishin një vizitë nga kreu i opozitës, kanë vendosur që të bllokojnë rrethrrotullimin që lidh qytetin, me pjesën jugore të vendit.
Si rrjedhim shumë automjete janë paralizuar dhe nuk kanë mundur që të kalojnë në asnjë nga kahet.
Thirrjet e protestuesve kanë qenë të njëjta me ato të protestuesve të Rrogozhinës. Ata janë dëgjuar të thërrasin kundër qeverisë, duke e akuzuar atë si shkaktare të drejtpërdrejtë të varfërisë që ka kapluar vendin dhe si arsyen kryesore të largimit të të rinjve drejt shteteve të tjera.
Duhet thënë se Fieri është qyteti kyç që lidh Shqipërinë e Jugut me pjesën tjetër të vendit dhe anasjelltas dhe bllokimi i sotëm i rrugës mund të ketë sjellë vonesa dhe probleme ndoshta të paparashikuara për qytetarët.
