Mëngjesin e sotmë partia “Lëvizja Bashkë” e drejtuar nga Arlind Qori ka protestuar para parlamentit duke kundërshtuar rritjen e pagave për ministrat dhe deputetët.
Teksa parlamenti miraton sot projektligjin që rrit rrogat e ministrave dhe deputetëve, Lëvizja Bashkë e drejtuar nga Arlind Qori është mbledhur para parlamentit për të protestuar kundër këtij ligji.
Protestuesit mbajnë në duar një pankartë “Mos u ngopshi”, teksa kanë hedhur dhe para false në tokë.
“Në Shqipërinë tonë pensioni minimal është sa askund tjetër në Europë, vetëm 80 mijë lekë të vjetra. Pensioni mesatar në qytet është 150 mijë lekë të vjetra. Unë bëra një llogari dhe rroga e deputetit do të jetë sa 39 herë më e lartë pensionet minimale, sa 21 pensionet mesatare. Ky është skandal i padëgjuar ndonjëherë në asnjë vend. Një deputet merr rrogë 6-7 herë më të lartë se një polic”, deklaroi Arlind Qori në protestë.
Gjithashtu sipas tij korrupsioni zhvillohet si pasojë e një bashkëpunimi të ngushtë në këtë kuadër nga ana e e opozitës dhe qeverisë dhe e vetmja gjë për të cilën zihen është pozicioni dominues.
“Si mundet në vendin tonë të ketë kaq shumë pabarazi? Ata që na qeverisin nuk duan t’ia dinë për popullin, ndihen aq të sigurt sa edhe mund ta dhjetëfishojnë rrogën e tyre. Kjo nuk është ndarje kur është puna për të vjedhur ata janë bashkë, ata bëjnë sikur zihen se duan pozicioni dominues në tryezën e korrupsionit”.
Gjatë protestës, Qori i bëri thirrje qytetarëve të reagojnë pasi nuk jetohet më me këto standarde dhe vendi jonë po zbrazet nga emigracioni masiv
“I bëjmë thirrje të gjithë popullit shqiptar të ngrihet në protestë se nuk jetohet kështu. Shqipëria po zbrazet nga njerëzit e punës dhe rinia. Hapësira publike po vidhet dhe të vetmit që gëzojnë janë oligarkët e pushtetarët. Mallkimi i këtij populli do t’i shoqërojë deri ditën e fundit. Ne nuk ndalemi deri sa të gjithë të korruptuarit të përballen me ligjin dhe pakënaqësinë e mllefin e popullit shqiptar”, tha Qori ndër të tjera në fjalën e tij në protestë.
