Ish-deputetja, Jorida Tabaku bën me dije se Partia Demokratike ka dorëzuar në Prokurori kallëzimin penal për Policinë e Shtetit dhe Policinë Bashkiake pas dhunës së ushtruar ndaj banorëve të Bregut të Lumit, më 9 prill, por edhe sot.
Në këtë padi kërkohet marrja e masave për sjelljen brutale, joligjore e johumane gjatë të gjithë periudhës kohore që ka pasur protesta, por veçanërisht gjatë mëngjesit të 9 Prillit ku fëmijë, gra e të moshuar u dhunuan barbarisht në gjumë nga shteti që duhet t’i mbrojë.
“Një i moshuar 76 vjeçar u operua në kokë, dy zonja me gjymtyrë të thyera, gra e vajza përfunduan në komisariat. Kjo sjellje kriminale e policisë duhet të marrë menjëherë përgjigje ligjore dhe urdhëruesit nga Kryetari i Bashkisë, Ministri i Brendshëm deri te Kryeministri duhet të vihen para drejtësisë. Këto sjellje prej banditësh të policisë që dhunën e ka për qytetarët dhe jo për krimin duhet të marrin fund njëherë e përgjithmonë bashkë me bandën në pushtet. Sa kohë që të vazhdojnë për aq kohë qytetarët jo vetëm nuk do të jenë të mbrojtur por do të gjenden nën dhunën e shtetit policor siç ndodhi sërisht sot. Shteti si hajdut shkoi në të gdhirë e dhunoi gra e fëmijë, largoi median e zaptoi banesat. Kjo sjellje duhet të marrë fund. Kjo sjellje prej pushtuesi e arroganti ndaj të dobtëve e të pambrojturve duhet të përfundojë. Kam bindjen që ky kallëzim do të flejë ashtu si flejnë dosjet e korrupsionit e dosjet e krimit, ashtu si fshihen përgjimet e vjedhjes së zgjedhjeve e ashtu si fshihen sa e sa krime. Por e sigurtë është që drejtësia vonon por nuk harron! Do të vijë dita kur këto shkelës ligji të vihen para drejtesisë,”- thotë Tabaku.
Më herët LSI kallëzoi penalisht edhe kreun e komisariatit nr.4, Agim Hoxha për dhunën ndaj një gruaje te Bregu i Lumit.
