Protestat kundër politikave të ashpra të imigracionit të administratës Trump po përhapen në gjithë Shtetet e Bashkuara, duke tejkaluar qytetet e mëdha si Los Angeles dhe San Francisco.
Demonstrata të reja janë shënuar në Atlanta, Seattle, Dallas, Louisville dhe New York, ku policia ka ndërhyrë me arrestime, sipas raportimeve të gazetës La Repubblica.
Përballë situatës që po përshkallëzohet, Donald Trump ka urdhëruar dërgimin e 2,000 pjesëtarëve të Gardës Kombëtare në Los Angeles, së bashku me 700 marinsa.
Sekretari i Mbrojtjes, Pete Hegseth, e justifikoi këtë vendim para Kongresit, duke theksuar se “ndërhyrja u kërkua nga vetë policia”.
Në Los Angeles, kryetarja e bashkisë Karen Bass shpalli shtetrrethim në disa zona të qendrës, pas rritjes së ndjeshme të arrestimeve, që kanë arritur rreth 400. Në New York, protestuesit kryesisht të rinj u mblodhën në Sheshin Foley, pranë gjykatave ku javën e kaluar u kryen arrestime të emigrantëve.
Ata marshuan nëpër pjesën jugore të Manhattanit me pankarta kundër ICE (shërbimi federal i imigracionit), i cili ka intensifikuar fushatat e arrestimeve në gjithë vendin.
Disa prej protestuesve mbuluan fytyrat për të shmangur identifikimin, ndërsa disa mbanin flamuj palestinezë në shenjë solidariteti.
Megjithëse në New York protesta kaloi më paqësisht, në Los Angeles përplasjet mes forcave të rendit dhe protestuesve janë bërë të dhunshme që prej së premtes. Kryetarja e bashkisë konfirmoi se shtetrrethimi në zonat e prekura do të zgjasë nga ora 20:00 deri në 06:00 të mëngjesit, sipas orës lokale.
Presidenti Trump ka reaguar ashpër ndaj protestuesve, duke i etiketuar si “pushtues të huaj” dhe “kriminelë të botës së tretë”, ndërsa disa prej tyre i quajti “kafshë”.
Ai sugjeroi pa prova se protestat mund të jenë të financuara nga dikush: “Nuk e di kush, por dikush po i paguan ata ose janë agjitatorë,” tha ai.
I pyetur nëse kishte në mendje guvernatorin e Kalifornisë, Gavin Newsom, apo kryetaren e bashkisë Karen Bass, Trump u tërhoq: “Nuk thashë këtë.”
Trump shtoi se trupat ushtarake do të largohen nga Los Angeles vetëm kur të rikthehet qetësia. I pyetur për rregullat e angazhimit të forcave në terren, ai nuk dha detaje, por u shpreh prerazi: “Nëse protestuesit janë të dhunshëm, hedhin tulla, pështyjnë në fytyrat e oficerëve apo godasin njerëz, ushtria do të përgjigjet me forcë të madhe dhe ata do të përfundojnë në burg për një kohë të gjatë.”
