Policia e Tiranës ka arritur që të arrestojë të riun i cili dogji pemën e Krishtlindjes gjatë protestës më 9 dhjetor.
Arrestimi i 22-vjeçarit O.Xh, në Komisariatin e Policisë Nr. 1erdhi pas identifikimit të tij nga kamerat përreth vendit ku ndodhi protesta.
“Nga specialistët për Hetimin e Krimit në Komisariatin e Policisë Nr. 1 u bë kapja dhe ndalimi i shtetasit O. Xh., 22 vjeç, pasi më datë 09.12.2020, gjatë protestës së zhvilluar në bulevardin “Dëshmorët e Kombit” i ka vënë flakën pemës së Krishtlindjeve”, thuhet në njoftim.
Materialet iu dërguan Prokurorisë së Rrethit Gjyqësor Tiranë, për veprime të mëtejshme.
Ndërkohë në raportimet e shumë mediave nuk u zbardh fare protesta e të rinjve, e aq më pak kauza, por shkruhej për djegien e pemës së Krishtlindjeve, duke u pozicionuar nga qeveria e duke vendosur në kryetitujt e tyre “dhunën dhe shkatërrimet” e pretenduar se ushtruan të rinjtë.
Propaganda e disa mediave arriti deri aty sa të krahasojnë heqjen e disa dritave nga pema me dhimbjen e familjes së Klodianit. Të tjera media pro qeverisë shkruan për letra fëmijësh drejtuar Ramës, të cilët kërkonin sërish pemën e Krishtlindjeve për festa.
E pas gjithë trishtimit të tyre, është rikthyer para Kryeministrisë pema e Krishtlindjeve.
Pema është dekoruar sërish dhe është vendosur në vendin që ishte më parë, pasi u dogj dhe u shkatërrua nga një grup protestuesish.
Kështu, u rikuperua edhe dhimbja e mediave dhe “VIP-ave” që “qanë” për djegien e pemës së Krishtlindjeve, por që nuk reagojnë për prerjen e pyjeve që nuk të le të mendosh se në Shqipëri ka moratorium pyjesh, tashmë prej katër vitesh…/Gazetareforma.com/
