Protestat në Beograd vazhdojnë, me mijëra studentë dhe mësues që janë mbledhur për të mbështetur kërkesat e tyre, duke zhvilluar një grevë të përgjithshme në Serbi.
Kërkesat e protestuesve përfshijnë përgjegjësinë e autoriteteve për ngjarjet tragjike, si dhe kërkesa për të ndaluar represionin ndaj aktivistëve dhe studentëve.
Mësimet janë pezulluar në shumë institucione arsimore në të gjithë Serbinë, duke u shprehur solidaritet me studentët dhe profesorët.
Dushan Kokot, kryetar i Sindikatës së Pavarur të Punëtorëve të Arsimit, tha se mësimi është bojkotuar në 50% të shkollave, ndërsa në qytetet më të mëdha ky bojkot ka arritur deri në 80%.
Kryeministri i Serbisë, Millosh Vuçeviq, reagoi duke thënë se nga nesër inspektorët do të monitorojnë shkollat për të kontrolluar ligjshmërinë e ndërprerjes së mësimit dhe kërkoi që politika të mbetet jashtë shkollave. Ai u bëri thirrje mësuesve dhe prindërve të mos përfshijnë fëmijët në politizimin e arsimit.
Protestat nisën pas tragjedisë në Novi Sad, ku 15 persona humbën jetën nga shembja e një pjese të kulmit të Stacionit Hekurudhor më 1 nëntor.
Studentët kërkojnë që autoritetet të marrin përgjegjësi dhe të hetojnë procesin e rindërtimit të stacionit.
Protestuesit kërkojnë gjithashtu që të hiqen akuzat ndaj atyre që u arrestuan gjatë protestave të mëparshme dhe të ngriten kallëzime penale ndaj personave që sulmuan demonstruesit.
