Protestat e gjera të fermerëve në Greqi po shkaktojnë paralizim të akseve kryesore rrugore dhe ndikim të drejtpërdrejtë edhe në lëvizjen drejt Shqipërisë. Fermerët grekë kanë vijuar bllokimin e rrugëve kombëtare për shkak të pakënaqësisë ndaj vonesave në dhënien e subvencioneve të Bashkimit Europian, situatë e përshkallëzuar pas një skandali korrupsioni që ka trazuar sektorin.
Si pjesë e këtyre bllokimeve, Policia Kufitare Kakavijë ka njoftuar se aksit Kakavijë-Janinë do t’i ndërpritet qarkullimi që nga ora 19:00 e ditës së sotme, në zonën e fshatit Kallpaq. Kufizimi do të qëndrojë në fuqi deri në një njoftim të dytë nga autoritetet greke.
Gjatë kësaj periudhe do të lejohen të kalojnë vetëm automjetet që paraqesin emergjenca shëndetësore. Policia Kufitare Kakavijë i bën thirrje udhëtarëve të planifikojnë paraprakisht lëvizjet e tyre dhe të shmangin oraret e bllokimit.
“Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar nga Policia Kufitare Greke se ditën e sotme, nga ora 19:00 deri në një njoftim të dytë, aksi rrugor Kakavijë-Janinë, në kryqëzimin të fshatit Kallpaq, do të jetë i bllokuar për shkak të protestës që do të zhvillojnë fermerët. Do të lejohen të qarkullojnë vetëm automjetet që do të kenë emergjenca shëndetësore. Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës”, bëri me dije sot policia.
Fermerët grekë kanë paralajmëruar se do të vazhdojnë protestat deri më 5 dhjetor, duke mbajtur të bllokuara rrugë, porte dhe pika doganore kryesore. Në ditët në vijim ata synojnë të mbyllin doganën e Promahonës në kufirin Greqi-Bullgari, ndërsa të shtunën është parashikuar një bllokadë e re në Siatistë nga fermerët e Kozanit, Grevenës, Kosturit dhe zonave përreth. Nëse qeveria nuk ndryshon qëndrim, javën e ardhshme pritet të bllokohen edhe portet e Volosit dhe Selanikut, duke e thelluar edhe më tej krizën e qarkullimit në vend.
