Protesta e sotme studentore në Serbi po konsiderohet si një nga më të vështirat për pushtetin e presidentit Aleksandër Vuçiç, ndërsa tensionet po përshkallëzohen jo vetëm në rrugë, por edhe brenda radhëve të forcave të sigurisë. Mediat serbe raportojnë se një numër efektivesh kanë refuzuar të marrin pjesë në protestë, ndërsa të tjerë kanë deklaruar se nuk do të konfrontohen fizikisht me qytetarët.
Sipas burimeve të kanalit informativ N1, disa njësi policore janë tërhequr, duke refuzuar të zbatojnë urdhrat për përdorimin e forcës ndaj protestuesve. “Zakonisht, në raste të tilla, në terren vendoset xhandarmëria, por tani kemi informacione se disa njësi kanë refuzuar të dalin në rrugë për të shmangur përplasjet me qytetarët,” raporton N1.
Kjo situatë shton presionin mbi Vuçiç, i cili përballet me një valë të madhe pakënaqësie mes qytetarëve dhe një sfidë të papritur brenda forcave të sigurisë. Refuzimi i policëve për të ndërhyrë dhunshëm mund të ndikojë në ecurinë e protestave dhe në strategjinë e qeverisë për të menaxhuar këtë krizë të re politike.
