Policia e Tiranës ka paralajmëruar organizatorët e protestës së thirrur nga opozita pasditen e sotme për pasojat ligjore në rast të bllokimit të akseve rrugore.
Sipas informacionit nga policia, PD ka kërkuar leje për zhvillimin e tubimeve nga ora 17:00 deri në 20:00 në disa akse kryesore të Tiranës, përfshirë Unazën e Vogël, rrethrrotullimin te Zogu i Zi, urën pranë xhamisë në Rrugën e Elbasanit, sheshin “Wilson” dhe nga Pallati me Shigjeta deri në Rrugën e Kavajës.
Policia thekson se bllokimi i rrugëve është një vepër penale sipas nenit 293 të Kodit Penal dhe çdo person që do të ndërmarrë veprime të tilla do të përballet me pasojat ligjore. Për të siguruar qarkullimin normal, janë marrë masa për devijimin e trafikut në rrugë alternative në rast bllokimi.
Njoftimi:
Përfaqësues të subjektit politik Partia Demokratike e Shqipërisë kanë paraqitur kërkesën për zhvillim të tubimeve, nga ora 17:00 deri në orën 20:00 të datës 23.12.2024, në disa akse rrugore kryesore në Tiranë, konkretisht: Unaza e vogël, rrethrrotullimi te Zogu i Zi, ura afër xhamisë në Rrugën e Elbasanit, sheshi “Wilson” dhe nga pallati me shigjeta drejt Rrugës së Kavajës.
Policia e Shtetit garanton të drejtën për tubim, të drejtat dhe liritë e pjesëmarrësve në tubime, por pa cenuar lëvizjen e lirë të qytetarëve dhe të automjeteve. Në bazë dhe në zbatimit të ligjit “Për tubimet”, Policia e Shtetit ka ndërmarrë të gjitha masat për garantimin e rendit publik, zbatimin e të drejtave dhe lirive të qytetarëve dhe të pjesëmarrësve në tubime, si dhe mbrojtjen e pronave publike dhe private.
Nisur nga objekti i kërkesës së bërë për zhvillimin e tubimeve në disa akse rrugore në qytetin e Tiranës, Policia e Tiranës i ka kthyer përgjigje organizatorëve se merr përsipër garantimin e tubimeve që nuk bllokojnë lëvizjen e lirë të automjeteve dhe qytetarëve. Bllokimi i akseve rrugore është vepër penale e parashikuar nga neni 293 i Kodit Penal dhe cilido që do të ndërmarrë veprime për të bllokuar rrugët, do të përballet me pasojat që sjell shkelja e këtij neni.
Për të ndihmuar qytetarët që do të qarkullojnë në akset rrugore të mësipërme, Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative. Policia e Shtetit apelon dhe një herë për zbatim të ligjit dhe respektim të lëvizjes së lirë të qytetarëve dhe automjeteve, gjatë orarit të tubimeve.
