Mijëra qytetarë nga e gjithë Kosova u mblodhën të enjten në sheshin “Skënderbeu” në Prishtinë për të shprehur solidaritetin dhe mbështetjen e tyre ndaj ish-udhëheqësve të Ushtrisë Çlirimtare të Kosovës, të cilët aktualisht po mbahen në paraburgim në Hagë, Holandë.
Kjo protestë u organizua nga Organizata e Veteranëve të UÇK-së, si një reagim kundër vendimeve të Gjykatës Speciale, të cilën e konsiderojnë të padrejtë ndaj figurave kryesore të luftës çlirimtare.
Në këtë tubim morën pjesë edhe përfaqësues të partive politike, aktivistë të shoqërisë civile, akademikë, liderë fetarë, artistë dhe sportistë.
Organizata e Veteranëve bëri thirrje për një pjesëmarrje të gjerë dhe paqësore, duke theksuar rëndësinë e ruajtjes së dinjitetit dhe vlerave të luftës së drejtë të UÇK-së, duke kundërshtuar çdo padrejtësi që cenon imazhin dhe sakrificën e luftëtarëve të saj.
Në mesin e të akuzuarve nga Dhomat e Specializuara janë ish-presidenti Hashim Thaçi, ish-kryeparlamentarët Jakup Krasniqi dhe Kadri Veseli, si dhe ish-deputeti i Lëvizjes Vetëvendosje, Rexhep Selimi, për akuza që lidhen me krime lufte dhe krime kundër njerëzimit.
