Fermerët e zonës së Myzeqesë do të protestojnë sot kundër projektbuxhetit të qeverisë, i cili nuk favorizon veprimtarinë e tyre bujqësore. Për këtë protestë, Policia e Shtetit ka angazhuar 100 forca rendi, që kanë zbarkuar në hyrjen e aksit rrugor Lushjne-Tiranë. Kjo protestë nisi në orën 11:00.
Protestuesit kundërshtojnë vendosjen e TVSH-ë 10% për inputet bujqësore dhe për heqjen e kompensimit 6% për ta. Ky projektbuxhet nuk ka parashikuar asnjë lloj ndihme dhe subvencioni për ta. Ish/zv-kryeministri Erion Braçe kritikoi ashpër projektbuxhetin për bujqësinë pasi favorizohen grumbulluesit e fruta-perimeve dhe jo fermerët e tregtarët.
Qeveria nuk ka parashikuar asnjë rritje subvencioni për fermerët ndërkohë që ka hequr dhe 6% kompesim. Në këto kushte fermerët së bashku me grumbulluesit kanë dërguar një pakete propozimesh, por deri tani nuk ka përgjigje. Në këtë protestë kanë dalë fermerë të shumtë të zonave: Lushnje, Fier, Berat, Divjake.
“Asgjë nuk shitet. Ne kemi investuar, e shikojmë se do ikim prapë. jemi me kredi, nuk e pagujmë dot, kredia do lekë. është folur për suvencione por ne nuk po marrim asgjë. Lekët nuk i kemi marrë. Jemi shumë të zhgënjyer, siç e shikoni këtu nuk kanë ardhur as gjysma e fermerëve.”- thotë një prej fermerëve.
“S’kemi marrë asnjë subvencion, çmimet janë rritur, malli nuk shitet po i hedhim gjitha në plehra. Kemi 30 vite që merremi me bujqësi, asgjë nuk po shitet”, tha një grua fermere.
“Ne kemi ardhur nga emigrimi kemi investuar dhe po mendojmë të ikim sërish në emigrim, jemi të zhgënjyer qeveria nuk na jep subvencione. Jemi ne borxhe në bankë. Emrat kanë dalë që jemi fitues të subvencione por nuk kemi marrë asnjë lekë. Shteti t’i japë zgjidhje”, u shpreh fermeri.
“Nëse unë do të punoja diku tjetër punoja 8 orë kurse tek puna ime punoj 16 orë. Ne jemi motori kryesor i furnizimit për prodhimet bujqësore. I kërkojmë qeverisë që të reagojë”, tha një djalë i ri.
