Ka ardhur dhe reagimi nga prokuroria pak orë pas publikimit të lajmit për vdekjen e një prej personave, konkretisht shtetasit turk, të shpallur në kërkim nga autoritetet shqiptare për laboratorin e drogës në Has.
Prokuroria konfirmon gjithashtu se në vendin ku është gjetur i vdekur 50-vjeçari janë gjetur dhe 113 kg e 507 gram heroinë.
Organi i akuzës shqiptare është informuar për ngjarjen ku përfshihet Nejdet Cesuroglu dhe vdekjen e tij në rrethana misterioze në Prishtinë në fillim të dhjetorit të vitit të kaluar.
“Në kuadër të hetimeve për procedimin penal numër 339 të vitit 2016 është caktuar nga Gjykata për Krime të Rënda masa e sigurimit arrest në burg në mungesë për njërin prej personave të dyshuar si anëtar të grupit kriminal, shtetasit turk Nejdet Cesuroglu, që ka lidhje për faktin e zbulimit të laboratorit dhe të lëndës narkotike më datë 18.10.2018 në fshatin Brenogë Has.
Nga Policia e Shtetit jemi njoftuar se më datë 02.12.2018 në Prishtinë, në kuadër të operacionit “FIRMA”, është gjetur i vdekur shtetasi turk Nejdet Cesuroglu, i datëlindjes 03.02.1969. Gjatë kontrollit të banesës, tek një dhomë e mbyllur janë gjetur tre valixhe të mbushura me 113 kg e 507 gram lëndë heroinë, për këtë fakt janë arrestuar nga autoritetet kosovarë katër shtetas”, deklaron prokuroria shqiptare.
