Bashkia Tiranë lajmëroi në fund të muajit prill se ka përfshirë rrugën “Myslym Shyri” në projektin e saj për korsi biçikletash, i cili parashikon ngushtimin e rrugës së makinave dhe ndalimin e parkimit.
Sot, rreth 2 javë nga vendimi i Veliajt, shumë biznese në këtë rrugë kanë shpallur falimentimin, teksa Dosja.al ka bërë një vëzhgim në këtë rrugë dhe mbi 15 biznese nga kryqësimi i Drejtorisë së Policisë deri në fund të rrugës në pikëtakimin me rrugën “Muhamed Gjollesha”, kanë nxjerrë tabelën në hyrje të bizneset se japin ambientin me qira.
Këto biznese, që kanë ‘lulëzuar’ në këtë zonë pas vitit 2000, janë vënë përballë një rreziku të madh ekonomik, pasi projekti nga Bashkia e Tiranës i kthen në biznese lagjesh, të tkurrura, të ndara, të pafuqishme, që luftojnë për bukën e gojës.
Pas vendimit, sipërmarrësit u ankuan se nuk u përfshinë në vendimmarrje dhe se nëse ndalohet parkimi dhe ngushtohet rruga të ardhurat e tyre nga aktiviteti mund të përgjysmohen.
Shumë biznese që u hapën pas pandemisë në rrugën Myslym Shyri e patën të vështirë të siguronin parkim për punonjësit, furnitorët, apo dhe klientët, sepse zona nuk ka hapësira të tjera për parkim.
Ky problem nuk është vetëm i bizneseve, por edhe i banorëve të kësaj lagjeje, pasi kjo zonë është kryesisht me pallate të vjetra, të cilat nuk ofrojnë mundësi parkimi, ndërkohë që së fundmi hapësira te ish-“Ekspozita Shqipëria Sot”, e cila shfrytëzohej për parkim me pagesë, i ka kaluar privatit për ndërtimin e një ndërtese.
Disa ditë më parë banorët u shprehën për mediat se kanë pasur probleme edhe më parë me ndarjen e hapësirave të parkimit, sidomos për ato pa pagesë – me vija të bardha – pasi ata nuk janë pyetur dhe bërë pjesë e vendimmarrjes.
Kjo nuk është hera e parë që Bashkia e Tiranës i ndërton korsitë e biçikletave pa standard të përcaktuar, pa respektuar plan-projektet e miratuara më parë dhe pa përfshirë banorët në vendimmarrje.
Vendimet e Veliajt për këtë çështje janë tepër të diskutuara, pasi kanë ngjallur polemika të shumta mbi mungesën e transparencës, teksa opozita i ka cilësuar shpesh si abuzive dhe me kosto të pajustifikuara.
