Kryeministri Edi Rama tha nga foltorja e Kuvendit se pjesë e procesit të rindërtimit, do të jenë edhe nxënësit e shkollave profesionale.
Kreu i qeverisë bëri me dije, se nxënësit do të trajnohen dhe më pas do të marrin eksperiencë në procesin e rindërtimit.
Njëkohësisht shefi i qeverisë u bëri thirrje të gjithë ndërtuesve që të japin kontributin e tyre, kundrejt një page që varion tek 420 euro mesatarja.
Përsa i përket punës në shtet, Rama kryeministri tha se do t’u takojë vetëm studentëve ekselentë, ndërsa shtoi se shtigjet për të punuar falë krushqisë dhe xhepit, do të shkojnë drejt një ngushtice të plotë.
“Çështja e dytë që dua të ngre si një informim i rëndësishëm është që kemi nisur të angazhojmë një grup për të orientuar 300 nxënës të shkollave profesionale për trajnime që t’u japim mundësi që të përfshinë për rindërtim dhe përmes kësaj pune të kenë eksperiencë. Në ditët në vijim ministri i Shtetit do të publikojë një tirrje të hapur për të gjithë ata që kanë njohuri për të gjithë ata që kanë njohuri në ndërtim dhe duan punë. Një nga sfidat më të mëdha të këtij procesi është nevoja e madhe për punë, për punonjës. Ky proces do të hap shumë vende pune dhe na duhen punonjës të kualifikuar me të gjitha proceset e ndërtimit. Nga njëra anë jemi të hapur të kryejmë trajnime dhe nga ana tjetër jemi të sfiduar nga fakti se ka shumë ankesa që thonë; s’ka punë. Ata që ankohen që s’ka punë kryesisht duan punë shteti. Kemi nevojë për punë me krah, të kualifikuar. Qeveria do të imponojnë që kompanitë e ndërtimit të vendosin një pagë mesatare që është në Shqipëri, që është 420 euro. Puna në shtet është një punë që i është lënë perspektives së studentëve ekselentë, apo të atyre që vinë nga eksperienca të suksesshme të tjera. Shtigjet për të punuar në shtet falë partisë, falë krushqisë e xhepit, do të shkojnë drejt një ngushtice të plotë. Punësimet në administratë janë punësime që e kanë fokusin tek ekselentë. Së shpejti do të hapet thirrja e re. I kemi kushtet për të synuar atë”, tha Rama.
