Deputeti aktual i Partisë Demokratike në Elbasan, Dashnor Sula nuk do të jetë në garë për zgjedhjet parlamentare të 11 majit, pavarësisht fitores në primaret e zhvilluara në këtë qark. Lajmi u bë i ditur nga vetë deputeti përmes një reagimi në mediat sociale.
Sula shprehet se përjashtimi i tij nga lista erdhi si rezultat i qëndrimit pozitiv ndaj punës së SPAK. “Në katër vitet si deputet, pranova sfidën e primareve ku dola i pari mes kandidatëve. Kam qenë ndër zërat më kritikë në parlament, duke denoncuar kontrabandën në sektorin e naftës dhe problematikat në bujqësi. Sot më komunikuan se nuk do të jem në listë për shkak se konsiderohem ‘SPAK-IST’,” shkruan deputeti.
Në deklaratën e tij, ai thekson se mbështetja ndaj reformës në drejtësi dhe institucioneve si SPAK e GJKKO ka qenë e palëkundur, duke i cilësuar këto struktura si më të besueshmet në vend. “Këto institucione kanë treguar se mund të veprojnë edhe ndaj të fortëve, çka për mua përbën krenari,” shton ai.
Deputeti shpreh shqetësim jo për fatin e tij personal, por për zhgënjimin e demokratëve që e mbështetën në primare. Ai paralajmëron se ky vendim do të ndikojë negativisht në rezultatin e PD-së në qarkun e Elbasanit për zgjedhjet e ardhshme.
