Këto ditë në Shqipëri është “ndezur” një debat lidhur me integrimin në Bashkimin Europian. Ai që ka reaguar nëpërmjet një statusi në rrjetin social Facebook ka qenë edhe prifti katolik Dom Gjergj Meta.
Në postim ai ka shkruar se nëse është e vërtetë që Europa nuk na pranon sepse në Shqipëri ka myslimanë, atëherë ai nuk do të shkojë në Europë.
Më tej në mesazhin e tij ai shkruan se nëse atë nuk e pranojnë bashkë me fqinjin e tij që shkon në xhami, ai e refuzon ofertën dhe vazhdon jetën.
Në fakt Shqipëria është një vend që njihet për tolerancën fetare. Kjo gjë është vlerësuar edhe nga shumë vende të botës. Por mesazhi I Dom Gjergj Metës përcjell gjithashtu një mesazh me vlera të mëdha.
Postimi i plotë i priftit katolik Dom Gjergj Meta:
Nëse është e vërtetë që Europa nuk na pranon, sepse në Shqipëri ka myslimanë, atëherë unë nuk dua të shkoj në Europë, sepse preferoj të kaloj jetën me miqtë e mi të zemrës me të cilët jam rritur, kam ndarë të mirën e të keqen, më janë gjendur e u jam gjendur, por të cilët shpallin një kredo të ndryshme nga e imja, se sa të jetoj me një holandez, a gjerman, a francez me të cilin shpall të njëjtën kredo. Nëse në Europë nuk më pranojnë bashkë me fqinjin tim i cili shkon në xhami, refuzoj ofertën e vazhdoj jetën!”
