Presidenti i Bullgarisë, Rumen Radev, ka reaguar ndaj zhvillimeve të fundit politike në Maqedoninë e Veriut, veçanërisht në lidhje me përfundimin e fushatës zgjedhore dhe ceremoninë e inaugurimit të presidentes së re të vendit, Gordana Siljanovska-Davkova. Në një deklaratë, Radev theksoi qëndrimin e Bullgarisë që Marrëveshja për Miqësi, Fqinjësi të Mirë dhe Bashkëpunim e nënshkruar në vitin 2017, si dhe marrëveshjet e tjera ndërkombëtare të cilat Maqedonia e Veriut është palë, duhet të zbatohen në mënyrë të rreptë.
Sipas Radev, përmbushja e këtyre marrëveshjeve është thelbësore për të siguruar stabilitetin dhe përparimin e marrëdhënieve ndërmjet dy vendeve, si dhe për të avancuar integrimit evropian të Maqedonisë së Veriut. Ai përkujtoi gjithashtu se Maqedonia e Veriut si anëtare e NATO-s ka detyrime dhe përgjegjësi që burojnë nga kjo anëtarësi.
Deklarata e presidentit bullgar vjen në një kontekst të ngjashëm me atë të kryeministrit grek, Kyriakos Mitsotakis, i cili gjithashtu ka reaguar kritikisht ndaj sjelljeve që shkelin marrëveshjet e nënshkruara. Mitsotakis veçoi sjelljen e presidentes së re të Maqedonisë së Veriut në ceremoninë e saj të betimit, e cila përmendi vendin e saj me emrin e vjetër “Maqedoni”.
