Prej muajsh marrëdhënia Kryeministri-Presidencë është krisur dhe shkak është bërë zgjedhja e anëtarëve të Gjykatës Kushtetuese.
Disa ditë më parë në një konferencë të jashtëzakonshme, Meta ka bërë publike fakte të reja për kreun e Këshillit të Emërimeve në Drejtësi Ardian Dvorani, ndaj të cilit ka depozituar edhe një kallëzim penal duke e akuzuar për aktivitet kriminal.
Kreu i vendit tha se do të depozitohet një shtesë në kallëzimin penal ndaj Dvoranit dhe theksoi se atij duhet t’i ndalohet veprimtaria e organizuar kriminale.
Ndërkohë dje bëri bujë një deklaratë e Metës, ku i bëri thirrje të gjithë popullit të dalë në një tubim më 2 mars kundër qeverisë, të cilën e akuzon për grusht shteti.
Ndërkohë, pasditen e sotme Presidenca ka bërë publike provat e reja ku vërtetohen shkeljet që kanë shoqëruar procesin e zgjedhjeve të anëtarëve të Gjykatës Kushtetuese.
Kreu i shtetit, Ilir Meta ka zgjedhur që provat të cënimit të Kushtetutës nga kryetari i KED, Ardian Dvorani dhe jo vetëm sipas tij, t’ja lërë këshilltarit ligjor të tij, Bledar Dervishi, teksa vetë u ul mes gazetarëve.
Sipas Dervishit ndonëse u kërkua zbatimi i radhës për zgjedhjen e anëtarëve të Kushtetueses, kjo procedurë nuk është ndjekur.
“Do bëj një përmbledhje të shkeljeve. Në 21 shtator 2019 Këshilli i Emërimeve në Drejtësi mblidhet për të bërë listimin e kandidatëve për 4 vendet vakante. Merr disa vendime, ndërmjet tyre dhe një vendim siç është pika dy. Në faqen e Gjykatës së Lartë ka një seksion për këshillin.
Prova e dytë; në 22 shtator, në faqen e Gjykatës së Lartë publikohen 4 vendimet e KED, për 4 vakancat. Këshilli vendosi miratimin e raportit dhe listën e kandidatëve për vakancën e shpallur nga presidenti-nga Kuvendi-nga presidenti-Kuvendi. Këshilli ka ndjekur radhën që dikton kushtetuta dhe ligji. President-Kuvend, Gjykatë e Lartë. Në datën 15 tetor presidenti i Republikës, pasi mori informacion nga Kuvendi, emëroi listat. Presidenti i kërkoi Kuvendit që të shprehej për emërimin e gjyqtarit të dytë, e me radhë. Duke parë se Kuvendi kishte vendosur që ta shtynte afatin, që sipas Dvoranit do të kapërcente këtë afat. Presidenti ndërmori një akt administrativ dhe ja drejton kuvendit kryetarit Ruçi, avokates Ballanca, dhe tek kryetari Dvorani. Në këtë shkresë paraprake kërkonte rregullimin e situatës. Presidenti mbështetur në normat kushtetuese, ka vendosur të pezullojë procesin administrativ të listës dhe praktikës së plotësimit të vakancave, deri në zgjidhje të gjyqtarit të 2-të. Presidenti i kërkoi KED plotësimin e dokumenteve.”, tha Dervishi.
Dervishi paraqiti në një monitor gjigand një shkresë, sipas së cilës ka qenë sekretari i Ministrisë së Drejtësisë ai që ka dërguar shkresën e KED për botim në Fletoren Zyrtare duke shkelur ligjin.
Duke iu referuar përgjigjes nga Qendra e Botimeve Zyrtare dhe më pas numrit të protokollit të shkresës së Ministrisë së Drejtësisë për Kuvendin dhe Kuvendit për QBZ, ai tha se kjo nuk është lajthitje por falsifikim, teksa ka deklaruar se po bëhet gati kallëzimi shtesë për SPAK dhe se prokuroria duhet të veprojë.
