Ministrja e Shtetit për Parlamentin, Elisa Spiropali ka folur për situatën politike në vend pas zgjedhjeve të 25 prillit, si edhe për qeverinë e re.
Spiropali e ftuar në “Dita jonë”, ka theksuar se opozita i ka njohur zgjedhjet e 25 prillit në momentin që ka pranuar mandatet e deputetit. Ndër të tjera Spiropali është shprehur se mazhoranca është e hapur për bashkëpunim me opozitën edhe pse kryetari i Partisë Demokratike, Lulzim Basha e ka mohuar që një gjë e tillë.
“Kryeministri ka përmendur bashkëpunim. Ne nuk kishim limit. Ne ofruam bashkëpunim sepse e dimë se sa i rëndësishëm është konsensusi për Shqipërinë. Për ne nuk kishte kufij, por duket se PD-ja është futur në një rrugë të vjetër, për kontestim të zgjedhjeve, por këtë e kuptojmë që është për përdorim të brendshëm, për zgjedhjet në PD. Lajmi i mirë është që do t’i kemi në shtator në Kuvend. Lajmi i mirë është dhe që ata i kanë pranuar zgjedhjet derisa kanë pranuar mandatet. Presidenti mund të jetë edhe nga opozita, jemi të hapur.
Është lajm shumë i mirë që opozita do të jetë në kuvend. PD e ka vuajtur këtë, por patjetër e ka vuajtur edhe publiku, pasi nuk i ka asnjë borxh ku ne thellohemi kaq shumë. Tashmë debati do të jetë demokratik. Në shtator ne do të prezantojmë programin dhe qeverinë e re”, u shpreh Spiropali.
Ndër të tjera Spiropali u pyet edhe për figurat PS-së që mbetën jashtë parlamentit të ri. Ajo theksoi se në qeverinë e re ka vend për të gjithë ata që kanë kontribuar, ndërsa pranoi se sistemi dhe fleta e votimit duhet parë sërish.
“Në këtë qeverisje të re ka vend për të gjithë ata që kontribuan. Për këtë arsye, edhe të këtij sistemi që ishte pak i panjohur, i cili kishte probleme edhe për shkak të fletës së votimit, mund të kenë mbetur jashtë për disa arsye. Ka vend për ta parë si fletën e votimit dhe këtë sistem”, tha Spiropali.
