Nga muaji qershor deri në korrik 2025, qytetarët shqiptarë kanë konsumuar pa dijeni salmon të tymosur të infektuar me bakterin vdekjeprurës Listeria monocytogenes, të importuar nga Serbia dhe të shpërndarë në supermarkete të vendit. Ky bakter shkakton infeksione serioze, me simptoma si temperaturë e lartë, dhimbje koke, marrje mendsh, humbje ekuilibri, dhe në rastin e grave shtatzëna, mund të çojë deri në lindje të parakohshme apo infeksione të rënda te të sapolindurit.
Sipas burimeve, janë importuar gjithsej 1,040 pako salmon të tymosur, të ndara në ambalazhe 50 g, 100 g, 200 g dhe 300 g. Pjesa më e madhe e këtij produkti ka pasur datë skadence më 6 korrik 2025 dhe është konsumuar nga qytetarët para se të njoftohej rreziku. Vetëm pas alarmit për praninë e bakterit u mor masa për tërheqjen e tij nga tregu. Ndërkohë, supermarketet kanë bërë thirrje për kthimin e produktit nga blerësit që nuk e kanë konsumuar ende.
Por Autoriteti Kombëtar i Ushqimit (AKU) nuk ka publikuar asnjë njoftim zyrtar për qytetarët, pavarësisht detyrimit ligjor për të garantuar transparencën dhe sigurinë ushqimore. Heshtja e AKU-së është jo vetëm alarmante, por kriminale.
Ky nuk është një rast i izoluar. AKU është përfshirë në një sërë skandalesh të përsëritura, me pasoja të rënda për shëndetin publik. I fundit, helmimi i fëmijëve në kopshtin nr. 1 në Gramsh përmes vezëve të kontaminuara me salmonelë. Një ngjarje e paralajmëruar, me sinjale të shumta të injoruara që nga marsi, përfshirë raportime për 69 mijë pula të ngordhura dhe 250 mijë vezë të bllokuara në fermën “Rea’s”, dhe raste të ngjashme në Durrës. AKU nuk mori asnjë masë parandaluese.
Lista e tmerrshme e skandaleve vazhdon:
- 1,535 kg mish me salmonelë në rrjetin KFC, nga të cilat u sekuestruan vetëm 177 kg
- 13.2 ton akullore me oksid etileni, një substancë kancerogjene
- Minj mbi thasët e miellit në fabrikën “Diamond”
- 985 kg acuge me parazitë
- 4,516 kg fileto derri me salmonelë
- 35 pesticide kancerogjene të zbuluara në produktet e konsumit të përditshëm
Pavarësisht gjithë këtyre fakteve tronditëse, asnjë përgjegjës nuk është ndëshkuar, asnjë kompani nuk është mbyllur dhe asnjë zyrtar nuk është shkarkuar. AKU vazhdon të heshtë dhe të justifikohet, si një institucion që ekziston vetëm në letër.
Ky është një krim i organizuar kundër shëndetit publik, që ndodh përpara syve të të gjithëve, ndërsa drejtësia bën sikur nuk sheh. SPAK duhet të ndërhyjë menjëherë dhe të hetojë të gjithë zinxhirin e përfshirë: nga fermeri, inspektori, drejtori, deri te ministri. Kjo është pasqyra e një shteti të kapur, ku edhe ushqimi është kthyer në rrezik për jetën.
Nëse nuk ka reagim të fortë shoqëror dhe institucional tani, nesër do të jetë shumë vonë.
