Pas më shumë se 24 orësh qëndrim në Kakavijë, 33 shqiptarë janë futur në territorin shqiptar.
Ndërkohë në tokën neutrale, që prej orës 03:00 të mëngjesit të djeshëm, ishin 67 shqiptarë.
Ambasada shqiptare në Athinë dha autorizim për kalimin e 33 shqiptarëve, duke qenë se në mesin e tyre kishte fëmijë, të moshuar dhe persona me nevoja shëndetësore.
Pjesa tjetër ndërkohë janë rikthyer në Greqi, pasi nuk kishin arsye të fortë, për të ardhur në Shqipëri, shkruan “Shqiptarja.com”.
Mësohet se shqiptarëve që u futën në territorin tonë, u kishte skaduar afati i qëndrimit 90 ditor në zonën Schengen, ose ishte në prag skadimi.
Mirëpo qeveria shqiptare ka deklaruar se për shkak të situatës së krijuar nga COVID-19, nuk do të ketë penalizim për tejkalim afatesh.
Shqiptarët që qëndruan më shumë se një ditë në kufi, janë rikthyer më në fund pranë familjeve të tyre.
Sipas procedurave të reja, shqiptarët që janë resident në Greqi dhe ato që kanë shkuar për punë, duhet të kenë autorizim nga konsullata shqiptare në Athinë për t’u kthyer në atdhe, duke paraqitur edhe arsye të forta.
Për shkak të masave të marra nga qeveria ndaj COVID-19, shqiptarët e kthyer në atdhe, duhet të qëndrojnë për 14 ditë të karantinuar.
