Mbrëmjen e sotme ka ndërruar jetë në spitalin Shefqet Ndroqi një tjetër mjek pasi ka humbur betejën me pandeminë e koronavirusit.
Mësohet se mjeku që u nda nga jeta është Sefer Dervishi nga Kavaja.
Mësohet se mjeku Dervishi kishte më shumë se dy javë i shtruar te spitali Covid-2, ose i njohur ndryshe si “Shefqet Ndroqi”. Gjatë dy javëve, gjendja e mjekut është përkeqësuar, kjo pasi Dervishi vuante edhe nga disa sëmundjeve bashkëshoqëruese.
Mjeku i ndjerë shënon viktimën e dhjetë nga Covid-19 në radhët e bluzave të bardha. I pari që humbi betejën me koronavirusin nga personeli mjekësor ishte Arjan Pushi. Fatkeqësisht, saga e virusit vijoi më tej, duke u marrë jetën: Hysni Shkjau, Anibal Byberi, Pëllumb Zef Maletaj, Agron Menzelxhiu.
Ndërsa për pesë personat e tjerë, që kanë qenë pjesë e stafit mjekësor dhe në vijën e parë të frontit me luftën ndaj Covid-19, nuk ka pasur të dhëna të tjera.
Ministria e Shëndetësisë ka bërë me dije se gjatë 24 orëve të fundit 3 persona kanë humbur jetën nga pandemia e koronavirusit. Mësohet gjatë 24 orëve të fundit kanë humbur betejën me COVID-19 një 57 vjeçar nga Lushnja dhe një 74 vjeçar dhe një 83 vjeçar nga Tirana.
Ndërkohë janë kryer në 24 orët e fundit 824 testime dhe janë konfirmuar 144 qytetarë të prekur me COVID19.
