Nëna e 24-vjeçares palestineze Rayyan Alwan, e cila u vra në Tiranë nga babai i saj Fadi Alwan, pritet të mbërrijë në Shqipëri për të dhënë dëshminë e saj lidhur me ngjarjen tragjike.
Ajo ka kontaktuar me autoritetet shqiptare dhe ka shprehur gatishmërinë për të bashkëpunuar me hetimin, në përpjekje për të zbardhur motivin që çoi në vrasjen makabre të vajzës së saj.
Pavarësisht njoftimit për ardhjen e saj, burime nga policia e Tiranës bëjnë me dije se deri tani nuk është paraqitur asnjë kërkesë zyrtare nga ajo apo familjarë të tjerë për tërheqjen e trupit të pajetë të 24-vjeçares, i cili vijon të mbahet në morg.
Dëshmia e saj pritet të ndihmojë hetuesit në sqarimin e rrethanave të ngjarjes dhe të japë dritë mbi arsyet që çuan Fadi Alwan të udhëtonte drejt Shqipërisë për të kryer krimin.
Sipas hetimeve, Fadi dhe Rayyan mbërritën në aeroportin e Rinasit më 19 shkurt, ndërsa ai u largua nga vendi më 22 shkurt, fillimisht drejt Greqisë dhe më pas në Amsterdam, duke u zhdukur më vonë në drejtim të Libanit ku dyshohet se ndodhet aktualisht.
Trupi i pajetë i Rayyan Alwan u gjet më 27 shkurt në banesën me qira në rrugën “Gjon Muzaka” në Tiranë, pasi pronarja e apartamentit njoftoi policinë.
Nga hetimet paraprake rezulton se vrasja ndodhi në harkun kohor mes datës 19 dhe 22 shkurt.
Fillimisht kishte konfuzion mbi marrëdhënien mes viktimës dhe autorit, pasi ata ishin prezantuar si çift dhe kishin qëndruar në të njëjtën dhomë me një krevat të vetëm.
Megjithatë, autoritetet gjermane konfirmuan më vonë se bëhej fjalë për një lidhje familjare Fadi ishte babai biologjik i Rayyan.
Ngjarja ka tronditur opinionin publik për brutalitetin e saj, ndërsa autoritetet shqiptare vijojnë përpjekjet për lokalizimin dhe ekstradimin e autorit të dyshuar.
